SEMINÁRIU SIENTÍFIKU BA SELEBRASAUN TINAN 10 IHA MISAUN “HUSI ASAUN BA IMPAKTU REAL”

 

Díli, 25/06/2026 - Iha ámbitu selebrasaun Aniversáriu ba dala X, AIFAESA realiza semináriu sientífiku ho tema “Husi Asaun ba Impaktu Real” ne’ebé hala’o iha Salaun Delta Nova, kinta ne’e.

Antes atu hahú atividade ne’e, AIFAESA hamutuk ho VPM/MCAE/MTA interino no MTC inklui konvidadu sira presta omenazen ba Eis Prezidente RDTL Dr. Francisco G. Lú-Olo ne’ebé hakotu ona peregrinasaun iha mundu ne’e.

Hafoin ida ne’e, Inspetora Jeral AIFAESA Dra. Odete da Silva Viegas, Dermatologista, hato’o liafuan badak hodi agradese ba konvidadu sira hotu hodi informa katak AIFAESA la’os servisu mesak maibé ho kontribuisaun husi entidade relevante sira no iha komunikasaun forte mak hatudu rezultadu di’ak. Nune’e iha kompromisu hodi redúz risku ba saúde públika.

Iha biban ne’e, Vise Primeiru Ministru, Ministru Koordenadór ba Assuntu Ekonómiku Interino no Ministru Transporte no Komunikasaun Eng. Miguel Marques G. Manetelu iha abertura hateten “haksolok tebes bele marka prezensa iha fatin ne’e selebra hamutuk ezisténsia tinan 10 AIFAESA”. Sua Exelénsia mós apresia ho tema ne’ebé AIFAESA hili no enkoraja atu kontinua servisu ho di’ak, tanba governu kompromete atu fó apoiu tomak ba servisu AIFAESA nian.

Entretantu, Oradores ba semináriu ne’e mai husi Diresaun Nasional Regulasaun Komersial (MCI) aprezenta kona-ba “Papel DNRPC hodi mantén estabilidade merkadu no proteje konsumidór”. Oradór seluk husi Trade Invest ne’ebé explika kona-ba “Trade Invest nia Papel iha transformasaun Ekonomia TL”. Iha fatin hanesan aprezenta mós husi IQTL ne’ebé ko’alia kona-ba “IQTL nia papel ba apoiu komérsiu no dezenvolvimentu ekonómiku iha TL”. Aleinde ne’e oradór seluk husi empreza ACELDA nu’udar empreza Timor-oan nian  ne’ebe halo ona exportasaun produtu ba nasaun seluk.

Iha sesaun lorokraik, oradores mai husi SERVE.IP., aprezenta liga ho sira nia papel, oradór ba daneen mai husi ANLA.IP ne’ebe ko’alia kona-ba “Husi lisensamentu ba sustentabilidade ambiental”. Fonte tuir mai aprezenta husi AIFAESA rasik kona-ba “Reflesaun husi implementasaun dekretu lei nú 43/2023. Oradór ikus husi parte IJT ko’alia kona-ba “Papel IJT nian hodi atinje impaktu real”.

Semináriu ne’e partispa másima husi, entidade relevante, setór privadu, órgaun AIFAESA, diretores, assessores no funsionáriu tomak. *FL*

Mídia - Ekipa SIP

SIP/AIFAESA.