Díli, 29/06/ 2026 – AIFAESA, I.P., ne'ebé kompostu hosi Órgauns, Asesóres, Dirijente Departamentu to'o Funsionáriu tomak, realiza misa Asaun de Grasa hodi komemora aniversáriu instituisaun nian ba dala X. Misa agradesimentu ne'e hala'o iha Igreja Motael, Farol, Dili.
Iha nia omília, Padre Selebrante, Pe. Joaquim Sarmento, hato'o parabéns ba AIFAESA ba tinan X no subliña katak selebrasaun Eukaristia ne'e nu'udar grasa ida ba responsabilidade no knaar ne'ebé funsionáriu sira hala'o nu'udar serbisu-na'in.
Hafoin remata misa, kontinua kedas ho selebrasaun jantar konfraternizasaun iha Salaun Delta Nova.
Iha biban ne'e, Sub-Inspetora Jerál hato'o agradesimentu wain ba konvidadu no partisipante sira ne'ebé mai hamutuk hodi haksolok no selebra aniversáriu AIFAESA nian.
Iha fatin hanesan, Inspetora Jerál AIFAESA nian, iha nia diskursu, relata progresu serbisu no hato'o apresiasaun kle'an ba entidade relevante sira ne'ebé hatudu ona kolaborasaun metin ho instituisaun ne'e, tantu iha nível nasionál no internasionál, inklui mós ba funsionáriu tomak ba serbisu hamutuk dezde inísiu to'o ohin loron.
"Iha inísiu instalasaun AIFAESA, I.P., ninia objetivu prinsipál mak atu proteje direitu konsumidór no nune'e mós operadór ekonómiku sira. Ohin loron, AIFAESA hatudu duni progresu ne'ebé di'ak tebes," dehan Koordenador Sesante, Sr. Abílio Oliveira Sereno, no Inspetór Jerál Sesante, Sr. Ernesto Monteiro, liuhosi sira-nia liafuan badak.
Reprezentante Governu, Vise-Ministru Saúde, dr. Flávio Brandão Mendes de Araújo, hato'o mós hakuak boot ba família boot AIFAESA nian ba prestasaun serbisu hotu ne'ebé mak sira hatudu ona iha idade tinan X ne'e. Nia hatutan katak papél boot AIFAESA nian mak atu salvaguarda povu nia direitu ba moris saudável hodi nune'e bele hasa'e nível koñesimentu no konsiénsia koletiva sosiedade nian ba moris saudável.
Iha selebrasaun ne'e, AIFAESA entrega Sertifikadu apresiasaun ba funsionáriu ezemplár sira. Alende ne'e, entrega mós sertifikadu ba manán-na'in sira iha kompetisaun kulinária, kompetisaun jogu single ténis meza (feto no mane), ténis meza ganda, no mós badminton.
Atividade selebrasaun ne'e hetan partisipasaun hosi reprezentante Governu, Organizasaun Mundiál Saúde (WHO), Instituisaun EP/IP sira, Ministériu relevante sira, Operador ekonomiku sira, inklui superiór sesante no eis-funsionáriu AIFAESA nian.**RL**
Mídia - Ekipa SIP
SIP/AIFAESA.
.png){kind=spacer}
No comments:
Post a Comment