AIFAESA REALIZA DIVULGASAUN INFORMASAUN BA AUTORIDADE MUNISIPÁL SIRA IHA DÍLI

 

Díli, 27/03/2026 - AIFAESA realiza atividade divulgasaun informasaun ba Autoridade Munisipál sira iha Díli ho tema “Hasa’e Kuñesimentu Autoridade Lokál sira nian kona-ba Regulamentu Ekonómiku sai Baze Fundamental Fortalesimentu Servisu Públiku” ne’ebé realiza iha salaun enkontru Matadouro, sexta-feira ne’e.

Iha biban ne’e reprezentante prezidente Autoridade Munisipiu Díli Sekretáriu Munisipál Administrasaun Planeamentu Sr. Filomeno M. da S. Smith hato’o agradese ba biban ne’e no husu atu Autoridade sira bele partisipa ho efetivu no koopera hodi bele asume papel importante iha komunidade liga ho AIFAESA nia servisu inspesaun iha terenu ba proteje konsumidores husi hahán nia risku.

Iha fatin hanesan, Inspetora Jeral Dra. Odete da Silva Viegas, Dermatologista iha abertura hateten “Kontinua agradese ba parte hotu ne’ebé marka prezensa, AIFAESA iha papél importante no ita bo’ot sira parte husi ami nia servisu, ami prontu simu Autoridade lokál sira nia hanoin tanba ita bo’ot sira nia papél mós importante atu jere ema, ami husu tulun ba ita bo’ot sira bele servisu hamutuk ho ami”. IG subliña.

Enkuantu, oradór ba atividade ne’e husi SERVE.IP., ne’ebé ko’alia kona-ba “tratamentu rejistu ba atividade komersiál”, oradór segundu husi AIFAESA rasik ko’alia  kona-ba “papél AIFAESA nian ba kontrolu kualidade aihan no la’os aihan inklui dever operadór ekonómiku sira nian ba kumprimentu lei”. Husi ANLA nian aprezenta husi Prezidente rasik Sr. Maximiano Oliveira kona-ba “prosedimentu trata lisensa ambientál ba kompañia investór sira”. Aleinde ne’e oradór ikus mai husi Tane Konsumidór ne’ebé aprezenta kona-ba papél Tane nian. 

Entretantu, atividade ne’e ensera husi Sub Inspetora Jeral DR. Quitéria da Costa, SIP., MPA no atividade ne’e partisipa husi Administradór Postu sira, Xefe Suku, Xefe Aldeia no Professores eskola. *FL*

Mídia - Ekipa SIP

SIP/AIFAESA.