DIRETÓR DPORAL HETAN ENTREVISTA HUSI MÍDIA RÁDIO-TELEVISÃO TIMOR-LESTE,EP (RTTL,EP)

 

Díli, 13/08/2026 - Kinta-feira semana ne'e, Diretór Departamento Planeamento Operasional Risku Ai-han no Laboratóriu (DPORAL), Ângelo Edmundo Belo, hetan entrevista husi Mídia RTTL,EP, iha kna'ar fatin AIFAESA, Matadouro Díli.

Hatan ba Jornalista katak, Autoridade Inspesaun no Fiskalizasaun ba Atividade Ekonómika Sanitária no Alimentar (AIFAESA.IP) halo kontrolu ba Indústria Tahu Tempe iha tinan ida ne'e husi inísiu fulan Janeiru to'o fulan Agostu. Bazeia ba dadus ne'ebe fornese husi Ekipa Operasionál katak AIFAESA halo enseramentu temporáriu ba Indústria Tahu Tempe hamutuk ha'at (4) durante tinan ida ne'e nia laran. Indústria tolu (3) maka prenxe ona rekezitus no reativa hikás ona no Ida (1) maka sei iha prosesu hadia sira nia fatin, ne'ebe mak antes ne'e hetan rekomendasaun husi ekipa tekniku hodi kria kondisaun tuir lei ne'ebe mak iha.

Aleinde ne'e Diretór mos esklarese katak dala barak ita nia Indústria sira ne'e iha komunidade nia le'et. Entaun Komunidade ne'ebe  hetan prejuízo ka ameasa ba saúde husi impaktu bee foer ne'ebe provoka iis ladun diak ka ambiente ne'ebe foer husi produsaun refere, automatikamente bele husu apoiu ka hato'o keixa kedas ba AIFAESA atu nune'e sei haruka ekipa tekniku sira tun ba terrenu hodi hare kondisaun real no foti desizaun tuir lei. 

Nune'e Servisu AIFAESA nian durante halo kontrolu ba konsumidor sira husi ekipa Inspetores halo inspesaun regular iha Díli laran, maibe husi parte AIFAESA konsiente katak seidauk halo kobertura máximu hodi haree lor-loron tamba produtu ida liu prazu laos tinan ida ka rua mak akontese maibe sirkulasaun produtu lor-loron lao hela, entaun iha neglijéncia ka deskuídu ruma produtu hirak ne'e bele to'o iha konsumidor sira nia le'et.

Iha biban ne'e AIFAESA husu ba komunidade sira no konsumidor hotu katak, ita nafatin "sai matan no tilun ba malu" hodi nune'e karik iha informasaun ruma ita bele fahe hodi halo prosesu ka foti medida ne'ebe rigorozu atu nune'e empreza sira labele repete tan ba futuru.

Diretór DPORAL mós subliña katak AIFAESA karik bainhira halo inspesaun ba empreza ruma no hetan kondisaun ladun diak ka la prenxe kritérius signifika katak hetan ponto kritikus lima ba leten ne'e konsidera empreza sira labele kontinua ba prosesu produsaun. Ho nune'e ekipa AIFAESA halo enseramentu temporáriu hodi hadia tuir kondisaun ne'ebe iha maka bele reativa hikas. 

Iha medida seluk maka aplika prosesu administrativa katak aplika sansaun ne'ebe ita bolu koima, bainhira empreza ruma komete duni irregularidade  konsidera atividade ho kondisaun la ijiene ka falta rekezitus hodi halo prosesu no foti medida hodi kumpri prosesu administrativa nian.

Prosesu normal ne'ebe ita halo karik sira hetan sansaun bazeia ba sira nia gravidade, tuir dekreto lei nu. 43/2023 ne'ebe mensiona ona katak empreza ne'ebe ki'ik, médiu no bo'ot ho ninia gravidade la hanesan ba sansaun ne'ebe mensiona ona no foti medida tuir empreza ho nia gravidade. 

Husi dekretu lei ne'e rasik koima ne'ebe ki'ik liu hahu husi $250,00 to'o $75000,00. Ba empreza ne'ebe bo'ot nia infrasaun ho gravidade a'as bele to'o $75000,00 no desizaun ikus Inspetora Jeral mak sei deside.

Média - Jo & Dy

SIP/AIFAESA.