Likisá, 10/04/2026 - AIFAESA liu husi órgaun to’o funsionáriu sira realiza serimónia hand over site ba projetu rehabilitasaun laboratóriu AIFAESA nian ne’ebé lokaliza iha Tibar, Munisípiu Likisá.
Iha okaziaun ne’e, Inspetora Jeral Dra. Odete da Silva Viegas, Dermatologista, hato’o agradese ba parte hotu no hateten ; iha momentu impotante ne’e bele harii ona laboratóriu ne’e liu husi prosesu naruk ida desde AIFAESA hamriik iha tinan 2016 to’o agora, maske iha situasaun difísil maibé iha esperansa katak mehi ne’e bele sai ona realidade.
Inspetora Jeral realsa tan katak, “antes ne’e alokasaun OGE só kobre de’it ba edifisiu, mas ho permisaun husi S.E, Vise Primeiru Ministru 1 nian no apoiu husi MPIE, ekipa husi ADN ho fundus Infraestrutura, mak enkoraja ami hodi mai ho pakote integradu ida, ikus mai hetan duni orsamentu USD 1.364.121,11.”
Marka prezensa mós iha eventu ne’e S.E., Vise PM-1, Ministru Koordenadór ba Assuntu Ekonómiku, Ministru Turizmu Ambiente Sr. Francisco Kalbuady Lay hodi hato’o apresiasaun no agradese ba parseiru dezenvolvimentu hotu ne’ebé fó apoiu finanseiru no tékniku ba realizasaun projetu ida ne’e.
Hanesan AIFAESA nia Ministru tuteladu, MCAE mós hato’o votus susesu mai AIFAESA ba rehabilitasaun laboratóriu ne’e, nune’e bele fo impaktu pozitivu ba povu tomak.
Entretantu, projetu ne’e sei rehabilita husi kompañia OCEANO ho durasaun fulan 6 no total orsamentu hamutuk USD 1.364.121,11, ne’ebé sei kobre ba rehabilitasaun infraestrutura, instalasaun ekipamentus dijitais, instalasaun ekipamentu laboratóriu, sosa reajentes, halo moru protesaun no halo fatin parkir ba funsionáriu sira. *FL*
Mídia - Ekipa SIP
SIP/AIFAESA.
.png){kind=spacer}
No comments:
Post a Comment